`தமிழ்ச் சொல்லாளர்’ மென்பொருள்
தமிழ்மொழியைக் கணினியில் பயன்படுத்துவதற்குத் தற்போது எழுத்துருக்கள், விசைப்பலகைகள், எழுத்துரு மாற்றிகள் போன்ற தனித்தனி மென்மங்கள் கிடைக்கின்றன. தமிழில் பல வலைத்தளங்கள், வலைப்பூக்கள் நிலவுகின்றன. ஆனால், தமிழுக்கு மைக்ரோசாஃப்ட் நிறுவனத்தின் வேர்டு போன்ற ஒரு முழுமையான சொற்செயலி அல்லது சொல்லாளர் என்றழைக்கப்படும் ஒரு மென்மம் உருவாக்கப்படாமல் இருந்தது. இது போன்ற மென்மத்தில் ஆவணத்தின் மொழிநடையில் எழுத்துப்பிழை உள்ள சொற்களைத் திருத்தித் தரும் வசதிகளும், அகராதிகள், சொல்லடைவு போன்றவையும் இடம்பெறும். இந்த வசதிகளைக் குறிப்பிட்ட மொழிசார்ந்த ஆய்வுகளின் அடிப்படையில்தான் உருவாக்க முடியும். இக்குறையைத் தற்போது வெளிவந்துள்ள மெந்தமிழ் மென்மம் நிறைவு செய்கிறது.
நம் தமிழ் மொழியை எழுதும் போது அதாவது தட்டச்சு செய்யும் போது தட்டச்சுப் பிழைகள் ஏற்பட வாய்ப்புள்ளது. மொழி இலக்கணம் மாற வாய்ப்புள்ளது (விகுதிகள்). ஒற்றுப் பிழை, ள,ல, ழ, ண,ன, ந, ர, ற ஆகிய எழுத்துக்கள் பயன்படுகின்ற இடமறியாது வழங்கும் பிழை முதலியவற்றை இம்மெந்தமிழ் மென்மம் திருத்தித் தருகிறது. ஆங்கில எம்.எஸ் வேர்டில் உள்ளது போன்ற வசதியே இஃது.
இன்றைய தமிழ்ச்சொற்களுக்கான அகராதி, தமிழ் இலக்கணம் முதலியவற்றை அடிப்படையாகக் கொண்டு இம்மென்மம் உருவாக்கப்பட்டுள்ளது. தமிழை கணிப்பொறிக்குக் கற்றுக்கொடுக்கும் முயற்சியாகவே இது தோன்றுகிறது. இத்தொடக்க முயற்சி நல் முயற்சியே.
தமிழில் வழங்கிவருகின்ற பல விசைப்பலகை அமைப்புகளும் 20 வகையான எழுத்துருக்களும் இம்மென்மத்தில் கொடுக்கப்பட்டுள்ளன. இதனால் தட்டச்சு செய்வதும் ஒரு எழுத்துருவிலிருந்து மற்ற எழுத்துருவிற்கு மாற்றுவதும் சாத்தியம். ஒருங்குகுறி இல்லாது வேறொரு எழுத்துக்குறியைப் பயன்படுத்தி எழுதியிருந்தாலும் அதனையும் ஏற்ற எழுத்து முறைக்கு மாற்றித் தரும் மேம்பட்ட மென்பொருளாக இம்மெந்தமிழ் மென்பொருள் விளங்குகிறது.
சொற்களிலுள்ள பிழைகளைக் களைய பேருதவி புரிகிறது. வல்லினம் மிகும் மிகா இடங்கள் தான் அனைவருக்கும் தலைவலியாக அமையக் கூடிய ஒன்று. இஃதும் இம்மென்பொருளால் கையாளப்படுகிறது. நாம் வல்லினம் இடவேண்டிய இடத்தில் இடவில்லை என்றால் அதுவே வல்லினத்தை இட்டும் இடக்கூடாத இடத்தில் நாம் இட்டிருந்தால் அதனைக் களைந்தும் செயல்படுகிறது. இம்மாதிரியான மென்பொருள் ஆங்கில மொழியில் கூட இல்லை என்று தான் சொல்ல வேண்டும். ஆங்கில மொழியில் எஃப் 7 என்ற பொத்தானை அழுத்தினால் `ஸ்பெல் செக்’ என்ற வாய்ப்பு வரும் அதிலும் ஏராளமான வார்த்தைகள் நமக்கு காட்டப்படும் அதிலிருந்து சரியான ஒன்றை நாம் தான் தேர்ந்தெடுத்துக் கொள்ளுதல் வேண்டும். ஆனால் இம்மென்பொருள் தானாகவே பிழை நீக்கிச் செயல்படுகிறது.
சந்திப் பிழை:
படித்து பார், வந்துப் பார் - இவ்விரு சொற்களில் முதலிலுள்ள சொல்லில்வல்லினம் இடவேண்டும் மற்றதில் வல்லினம் இடத்தேவையில்லை. இப்பிழை நம்மால் தட்டச்சிடப்பட்டால் இதைக் களைந்து உதவுகிறது மெந்தமிழ் மென்பொருள்.
ஆங்கிலத்திற்கு இணையான தமிழ்ச்சொல் எழுதி:
நாம் ஆங்கில் சொற்களை சில தருணங்களில் அப்படியே தமிழில் அதாவது தங்கிலிஷ் ஆக எழுதி விடுவோம் அதனை அழகு தமிழில் மாற்றித் தருகிறது இம்மென்பொருள்.
உ.ம்
நான் காலேஜ் செல்லும் வழியில் என்னுடைய ஸ்கூல் டீச்சரைப் பார்த்தேன்.
நான் கல்லூரி செல்லும் வழியில் என்னுடைய பள்ளி ஆசிரியரைப் பார்த்தேன்
அகராதிகள்:
தமிழ்-ஆங்கிலம், ஆங்கிலம்-தமிழ் ஆகிய அகராதிகள் அடிப்படையில் இம்மென்பொருளில் நிறுவப்பட்டுள்ளது. தற்காலத் தமிழ்ச்சொற்களாக 41 ஆயிரம் சொற்கள் உள்ளிடப்பட்டுள்ளன.
இணைச்சொல் அகராதி:
ஒரு சொல்லுக்கு இணையாக உள்ள வேறு சொற்களையும் நமக்கு வழங்குகிறது இம்மென்பொருள். `வெட்கம்’ என்பதற்கு இணையான கூச்சம், நாணம், தயக்கம் என்பனவற்றைக் காட்டும்.
எதிர்ச்சொல் காட்டி:
சொற்களுக்குண்டான எதிர்ச்சொற்களையும் வழங்குகிறது.
(உ.ம்)
`வெறுப்பு’ என்ற சொல்லுக்கு எதிரான சொல்லைத் தேடினால் விருப்பு, அவா, அன்பு, பாசம், நாட்டம், பிரேமை, பிரேமம், விருப்பம் போன்ற சொற்களைத் தருகிறது.
மயங்கொலிச்சொல்லகராதி:
ல,ள,ழ-ந,ண,ன-ர,ற மயக்கங்களைக் களையவும் ல-ழ குழப்பம் நீங்கவும் அகராதி இடம்பெற்றுள்ளது.
அகரவரிசைப்படுத்தி
பதிவில் அல்லது கட்டுரையில் தேவையான சொற்களை மட்டும் தேர்ந்து அகரவரிசைப்படுத்த உதவி நிற்கிறது.
சொல்லடைவு
சொற்பட்டியலுடன் சொல் வரும் பக்கங்கள் வழங்குகிறது
எண், எழுத்து மாற்றி
எத்தகைய எண்களையும் தமிழ்ப் புணர்ச்சி விதிப்படி தமிழ்ச் சொற்களாக மாற்றித் தரும்.
(உ.ம்)
76896 - எழுபத்தாறாயிரத்து எண்ணூற்று தொண்ணூற்று ஆறு
பிடிஎஃப் மாற்றி
தேவையான கோப்புகளை பிடிஎஃப் கோப்பாக மாற்றவும் வசதி செய்து தருகிறது.
துணைநூல் பட்டியல்
ஆய்வாளர்களுக்குப் பயன்படும் வகையில் துணைநூற்பட்டியல் தயாரிப்புக் கருவி ஒன்றும் இடம்பெற்றுள்ளது. எம் எல் ஏ, ஏபிஐ, சிகாகோ போன்ற பலவகை ஆய்வு நடைகளில் துணை நூற்பட்டியல எளிதாகத் தயாரிக்க உதவும் இக்கருவியானது, தமிழ் மென்மத்தில் முதன்முதலாம இடம்பெற்றுள்ளது.
மேற்குறிப்பிட்ட பல தமிழ்க்கருவிகளோடு, தட்டச்சு செய்யப்பட்ட ஆவணங்களைப் பதிப்பிக்க உதவும் கருவிகளும் இதில் இடம்பெற்றுள்ளன. மேலைநாட்டு மொழிகளுக்கான சொல்லாளர் அல்லது சொற்செயலி மென்மக்களுக்கு இணையாக, கணினித் தொழில்நுட்பத்தைப் பின்பற்றி இம்மென்மம் உருவாக்கப்பட்டுள்ளது.
இம்மென்பொருள் 2011 ஆம் ஆண்டு சிங்கப்பூ, மலேசியா ஆகிய நாடுகளில் செப்டம்பர் திங்கள் வெளியிடப்பட்டது. அங்கு மிகுந்த வரவேற்பைப் பெற்றுள்ளது.
ஆக்குநர்கள்
இம்மென்பொருளை சென்னைப் பலகலைக்கழக்த்தின் மேனாள் தமிழ் மொழித்துறைத் தலைவரும் இந்நாள் தமிழ்ப் பேராயச் சிறப்பு நிலைப் பேராசிரியருமான முனைவர் ந.தெய்வசுந்தரம் அவர்கள் தனது வல்லுநர் குழுவுடன் பத்து ஆண்டுகளுக்கும் மேலாக இணைந்து உருவாக்கியிருக்கிறார்.
விலைக்கு
தற்போது இம்மென்பொருள் விலைக்கு வந்துள்ளது. இதன் விலை உரூபாய் இரண்டாயிரமாகச் சொல்லப்பட்டுள்ளது. கழிவும் வழங்கப்படுகிறது. தற்போது நடைபெற்ற உலக இணைய மாநாட்டில் ஆயிரம் உரூபாய்க்கு விற்கப்பட்டது குறிப்பிடத்தக்கது.
அதிகமாக வாங்குபவர்களுக்கு ஏற்ற கழிவும் வழங்கப்படுவதாகச் சொல்லப்பட்டுள்ளது.
தொடர்புக்கு
இம்மென்பொருள் வேண்டுவோர் ,
ஒருங்கிணைப்பாளர், கணினித்தமிழ்க் கல்வித்துறை, தமிழ்ப்பேராயம், எஸ்.ஆர்.எம் பல்கலைக் கழகம், காட்டாங்குளத்தூர் - 603 203. என்ற முகவரியை நாடலாம்.
அல்லது
இணையத் தளம் www.srmuniv.ac.in/tamil_perayam.php, www.lingsoftsolutions.com
மின்னஞ்சல் mentamizh.tp@srmuniv.ac.in
கைப்பேசி 97909 00230
தொலைபேசி 91-44-2745 1645, 2741 7375
ஆறாம் உலகத் தமிழ் இணைய மாநாடு 2003ஆம் ஆண்டு சென்னையில் நடைபெற்றது.
